ဆိတ်သား ပဲပုပ်ချက်

ခေါင်းစဉ်ဖတ်ပြီး ဘာဟင်းပါလိမ့်လို့ စဉ်းစားနေလား။ ဘာမှမဟုတ်ဘူးဆိုတာ ပြီးရင်သိပါလိမ့်မယ်။
တကယ်တော့ ဒီဓာတ်ပုံလေးကို ရိုက်ထားတာကြာပါပြီ။
အိမ်ကို ဖုန်းဆက်တိုင်းမှာ မေမေက “ဒီနေ့ဘာဟင်းချက်စားလဲ...စားရတာရောအဆင်ပြေရဲ့လား” ဆိုပြီး အမြဲမေးတတ်တယ်။
ကိုယ့်ကိုမွေးထားတဲ့အမေဆိုတော့ ကိုယ်ဘယ်လောက်ဟင်းချက်ပျင်းတယ်ဆိုတာ အသိဆုံးနေမှာပေါ့။

အဲဒါနဲ့ ကိုယ်လဲ ကိုယ်စားတဲ့ဟင်းတွေရယ်၊ ချက်ပုံချက်နည်းတွေရယ် ပြောပြလိုက်တော့ မေမေလဲ တော်တော်စိတ်ညစ်သွားပုံ ရပါတယ်။
“စားလို့တော့ တော်တော်ကောင်းမှာပဲ” လို့ကောင်းချီးပေးတယ်။
ဒါနဲ့ သိပ်မဆိုးကြောင်းကို သက်သေပြတဲ့အနေနဲ့ ကိုယ့်မှာ ကိုယ်ချက်ထားတဲ့ဟင်းလေးတွေကို ဓာတ်ပုံရိုက်ပြီး အိမ်ကိုပို့ပေးရတယ်။
အခုပြောပြမယ့် ဟင်းလေးက အဲဒီဓာတ်ပုံလေးတွေထဲက တစ်ခုပေါ့။
နောက်ပြီး မေမေက လူကြုံရှိတိုင်း ကိုယ့်ကို အစားအသောက်လေးတွေပို့ပေးတတ်တော့ ကိုယ့်မှာ မြန်မာအစားအစာ ပြတ်တယ်လို့သိပ်မရှိလှဘူး။
အခုလဲ မေမေပို့ထားတဲ့ ဆိတ်သားခြောက်ကို မေမေကြော်ပေးလိုက်တဲ့ ပဲပုပ်ကြော်နဲ့ ရောချက်မှာပါပဲ...ဟဲဟဲ။

အိုးတစ်လုံးထဲကို ဆီနည်းနည်းရယ်၊ (၀ါးလို့လွယ်အောင်) သေးသေးလေးတွေတုံးထားတဲ့ ဆိတ်သားခြောက်တွေရယ်၊ ဗူးထဲက ready made ခရမ်းချဉ်သီးအနှစ်ရယ်ကို အားလုံးရောပြီးထည့်လိုက်တယ်။ နောက်ပြီး ပဲပုပ်ကြော်နည်းနည်းထည့်လိုက်တယ်။
(တကယ်တော့ ကြက်သွန်နီ/ဖြူ ဆီသတ်ရမှာပျင်းလို့ပဲပုပ်ကြော်ထည့်တာ။
အဲဒီထဲမှာ ကြက်သွန်နီ/ဖြူ၊ ငရုပ်သီး အကုန်ပါပြီးသားဆိုတော့ အဆင်ပြေတယ်လေ။
ဒီတော့ ပဲပုပ်ကြော်မရှိလဲ ရှိတာသာထည့်လိုက်။)
ပြီးတာနဲ့ ရေနည်းနည်းထည့်တည်ထားလိုက်၊ ဆီပြန်ခါနီးရင် ငရုပ်သီးစိမ်းပွနည်းနည်းထည့်လိုက်ရင်အောက်ကပုံထဲကလို ဟင်းတစ်ခွက်တော့ရမှာပဲ။

နောက်ပြီး ရယ်စရာတစ်ခု ပြောပြရဦးမယ်။
အဲဒီနေ့က ဟင်းလည်းကျက်ရော ကိုယ်လည်း အဲဒီနေ့စားဖို့အတွက် တစ်ရက်စာကို ပန်းကန်ထဲမှာထည့်ထားပြီး ကျန်တာတွေကို ရေခဲသေတ္တာထဲထည့်သိမ်းလိုက်တယ်။
ကိုယ်က ဟင်းတစ်ခါချက်ရင် ၂-၃ ရက်စာချက်တာ။ ခဏခဏချက်ရမှာပျင်းလို့။
အဲဒီအချိန်မှာပဲ ကိုယ်နဲ့ Unit တစ်ခုတည်းအတူနေတဲ့ ဂျပန်မလေးက မနက်စာစားနေတော့ ကိုယ်က ကိုယ့်ရဲ့ဟင်းပန်းကန်လေးကို နည်းနည်းမြည်းကြည့်ပါဆိုပြီး သူ့ကိုပေးလိုက်တယ်။
ဘာကိုနားလည်မှုလွဲသွားတာလဲတော့မသိဘူး။
သူက အဲဒီပန်းကန်ကိုယူပြီး "Oishi .. Oishi..(အရသာရှိလိုက်တာ..)" ဆိုပြီး တစ်ဇွန်းပြီးတစ်ဇွန်းခပ်စားလိုက်တာ တစ်ပန်းကန်လုံး ပြောင်မှပဲ ပန်းကန်ကိုချတော့တယ်။
ကိုယ်လည်းသူ့ကိုကြောင်ပြီးရပ်ကြည့်နေမိတာ...သူကစားလို့ပြီးသွားတော့ “ကျေးဇူးတင်ပါတယ်”လို့ ပြောတော့မှပဲ
“ငါတို့က အဲဒါကို ဒီတိုင်းမစားဘူး၊ ထမင်းနဲ့စားတာ” လို့တစ်ခွန်းပဲပြန်ပြောဖြစ်တော့တယ်။
နောက်မှ ခုနကခွဲချန်ထားတဲ့ နောက်နေ့စာထဲက ယူစားလိုက်ရတယ်။
တော်သေးတာပေါ့...ခွဲချန်ထားမိလို့။ မဟုတ်ရင် အကုန် ကုန်မလားပဲ။